1.به بر

بیا ءُ وتی یاتاں به بر

یاتانی سوگاتاں به بر

دوستی ءُ دروتءُ درواهیءِ

دردانی هرّاتاں به بر

وزواسءُ بژنءُ بژ بَشاں

اپسوزءُ هیهاتاں به بر

چمّانی ارساں ترونگلیں

کهتانی کور چاتاں به بر

تیر کوءُ تور شتاں تهءَ

شکّوگیں شهماتاں به بر

اُپّارگءُ آهاں دلءِ

پاهارءُ پریاتاں به بر

بَر برتکگیں بیراں وتی

سَسّاءِ سیه گواتاں به بر

سوچ عابدءَ درگل وتی

کولیگءُ هیراتاں به بر

3.برو وام کن یا پنڈ

منءَ جست کت پیری مراد جان ماتءَ

که بیا شومین بچءَ کتگ مارا چاتءَ

نه وارت لوگءِ وراکاں ایے چار بیل انت

گوں مشتان ۓ مان بستگ اوبالین درّیں

اے اشکندءَ آسے کتگ روک لوگءَ

دلءَ مئے وران انت چو دارءَ ءُ کوگءَ

تو برات ۓ اے نکسءَ نی مارا اَڑینتگ

پت ۓ بزکاریں ماں پونزءَ رسینتگ

نه بیت انگت زانگ که پیل انت یا پاس انت

اگاں پاس انت اے سالءَ سیمی کلاس انت

بها کن گوش ایت هشترءَ یا که گوکءَ

اگاں نه بن ۓ مچ چه مچّانی توکءَ

برو وام کن یا پنڈ چو که پکیران

من زیراں من زیراں سید گنجءَ زیراں

5.چوں کناں همبل

چه گماں ژنداں ، چوں کناں همبل

ماسگےبنداں ، چوں کناں همبل

دل تتگ ترهتالءُ ترسیںترانگ

مُوکوی تنداں ، چوں کناں همبل

هُشتگ اَنت کهنءُ چمّگءُ بُنزه

سندءُ دَربنداں ، چوں کناں همبل

دل مرادانی که گُلیںگیمرت

 چوٹواں رنداں ، چوں کناں همبل

وژمیاتکانی کار ءُ کرداراں

چمّءِ وت گنداں ، چوں کناں همبل

گمجتاں ، گیابان ءَ گنوکانی

گوں گماں کنداں ، چوں کناں همبل

کت منءَ دزگیر دهرءِ مهراباں

بندے آں بنداں ، چوں کناں همبل

کوڑویںامروز ءِ کُڑاں سگاں

کوهیںگور گنداں، چوں کناں همبل

نه سلامےءُ نےگُلیںدروتے

رهسراں ننداں ، چوں کناں همبل

 سلمان په درّیںدُرگلءَ کور انت

سهگریں پنداں ، چوں کناں همبل

4.

تنزءُ تیر / گُلی

گلی اِش کسانیءَ کُت سیرءُ آروس
اجب رنگے بکشاتگ ات ربّءَ مهتوس1
ستر سندۓ بازات نه اَت سیزدهءَ گیش
هزارءَ هبر آرت ، چه وت هیش چه دربیش
نه دات اِش اے گوهر کسءَ گراں بهائیں
گلی نازءُ نایاپتءُ بے مٹّءُ تائیں
گڑا آسر مُرگ نشت ، په بچدرّءِ2 چکّءَ
بها نیست ات بچدرّءَ ننگیں دوٹکّا3
کجا اَرشی پریشتگ ، کجا لنگیں بچدرّ
کجا آ ملوک مهزبءُ اے سرا هرّ4
گُلی لانٹءُ5 لاڑے اَت ماتءُ پتانی
گُلی یکیں ارمان اَت بازین دلانی
تبءُ هیل ۓ گون ات چه هورءُ پریءَ
دپءِ پُلّیں بچکند ، چه آسمیءَ
چه کبگاں کهیبءُ چه گُلسهراں گوناب
چه آهوگاں دیدگ ، همارینءُ نیم واب
گوں بالادءَ سولیں گوں بیکّاں شپاریں
گوں کنڈیں زنوکءُ ، انارکاں اناریں
گوں دنتاناں کُچکینءُ ملگوران سیاهیں
گورءِ شارءُ شیشارءُ هاراں تلاهیں
آ کاٹاریں پونزءُ آ سیه ماریں برواں
گدارےءَ باهینت ، پارسایاں ایمّان
گُلی جوڑ کت ربّءَ ، گوش ۓ وت گوں دستاں
جت ۓ جنگےءَ گوں ، جتائیں چه درستاں
بلے مان ات گلجانءَ یک ایبے زنڈیں
چو دیمیگیں دنتانے جُڑّءُ کلنڈیں
دمان په دمان دست ۓ پندولءَ ره دات
6مشوک ڈکّے ڈکّے ، کچرکءِ7 تلءَ ۓ دات!

1- مهتوس: ماهءِ شهمءُ برمش توسینوک ، مهرنگءُ شر رنگ
2- بچدرّ: مردینے نامے بلوچی
3- ٹکّا: زرءِ کسترین بهر چو قَرانءُ شاهی
4- سراهر: چلو پک کار ، هما مردم که دگرانی نوکریءُ کلفتیءَ کنت ، بیگار
5- لانٹ: نازگل
6- مشوک: نسوار ، تمباک که لنٹءِ چیرءَ کنگ بیت
7- کچرک: کچِک ، لنٹ

2.سقراطءُ بقراط

منءَ بل

منءَ سوچ

منءَ ستکگیں نانے بلکیں بها نیست

بلے گوں اے گپءَ به ۓ تو اجکّه

منءَ لهتے شهزانتیں شاگرد هست اِنت

وتی دورءِ سقراطءُ بقراط انت بے شک

ارسطو

فلاطون

سرءَ اِش پهر بند ایت.

نظرات شما عزیزان:

نام :

آدرس ایمیل:

وب سایت/بلاگ :

متن پیام:

نظر خصوصی

 کد را وارد نمایید:

 

 

 

عکس شما

آپلود عکس دلخواه: